Круглый стол «Трагедия в Хатыни в контексте геноцида белорусского народа в годы Великой Отечественной войны»

22 сакавіка 1943 г. нацыстамі была знішчана разам з жыхарамі вёска Хатынь. Яна стала сімвалам палітыкі генацыду ў адносінах да беларускага народа ў гады Вялікай Айчыннай вайны. Загінула 149 чалавек, 75 з якіх былі дзецьмі.

Гэтай трагічнай падзеі ў гісторыі беларускага народа быў прысвечаны круглы стол, які прайшоў на факультэце гісторыі і міжкультурных камунікацый. З прывітальным словам да ўдзельнікаў мерапрыемства звярнуўся прарэктар па ідэалагічнай і выхаваўчай рабоце ГДУ імя Ф. Скарыны к. ф.-м. н. дацэнт Д. А. Хадановіч. Ён адзначыў важнасць захавання гістарычнай памяці аб Вялікай Айчыннай вайне для прадухілення пагрозы адраджэння нацызму.

Дэкан факультэта гісторыі і міжкультурных камунікацый к.г.н. дацэнт С. А. Чаропка ў сваім выступленні адзначыў, што злачынства ў Хатыні з'яўляецца элементам маштабнай палітыкі генацыду нацыстаў у адносінах да беларускага народа. Ён ахарактарызаваў гэтую палітыку на прыкладзе Гомельскай вобласці.

Загадчык кафедры ўсеагульнай гісторыі д.г.н. прафесар М. М. Мязга выклаў ход трагічных падзей 22 сакавіка 1943 г., ахвярамі якіх сталі жыхары Хатыні. Галоўную ролю ў гэтым жахлівым злачынстве сыграў 118-ы паліцэйскі батальён. Яго касцяк складалі былыя вайскоўцы Чырвонай Арміі, якія былі ўзятыя ў палон пад Кіевам у верасні 1941 г. і перайшлі на бок ворага. У гэтым злачынстве ўдзельнічаў батальён СС «Дзірлевангер», які знішчыў за час вайны па меншай меры 120 тысяч мірных жыхароў Беларусі.